منظر المشاية

شاهد ابعينك يسامع منظر المشايه

راح تعرف عالنهر لسَّا بقت يا رايه

راية الله وبيها دم

من منحر الشهيد

يا مُنصف ارجوك تمعن بالذي تسمَع
واخذ الدرس وارتوي من صافي هالمنبع
معلوم مَگصود كلامي ابأول المطلع
يا مصرع احيه السُنن خبِّرني يا مصرع

ليش ما تسأل ضميرك يالضميرك واعي؟

ليش بالطف كل سنه يرتفع صوت الناعي

يا سبب خله الحُسين ابكل زمن جديد؟

راية الله وبيهه دم

من منحر الشهيد

خلينه نطرح طرح واناقش ابعاده
وانشوف مطلب حُسين و نفهم امراده
واب إذِن ناقِد نِحاول نسمع اشناده
واشلون قدّم إخوته وصحبه واولاده

ناتج التحليل واضح هاك اخذ تبياني

ناده هيهات آنه اذلن للدعي السفياني

مثلي مَيبايع أبد طاغي مثل يزيد

راية الله وبيهه دم

من منحر الشهيد

ميزان خلي العقل واترك مواريثك
واستنجد ابخالِقك واتيقن ايغيثك
من غير دين النبي كل دين ميفيدك
بيدك طريق السَقر والجنه هم بيدك

شوف يا منهج يروح ال ألله وال رضوانه

وأدري بيك احسين تدري للنبي ريحانه!

أظن واضح مقصدي للعاقل الرشيد

راية الله وبيهه دم

من منحر الشهيد

أكثر أوضِّح إلك يا سامعي إفهم
من كربله اخذ العِبر وادرسهه واتعلم
دين الله بيها انبنه من بعد ماْ اتهدم
للتضحيه وللفداء وللمجد منجم

من بعد ما لوَّثه ايزيد ابفجوره وهانه

عاد من ثار الحُسين الإصله والقرآنه

حين ناده لا أقر إلكم كما العبيد

راية الله وبيهه دم

من منحر الشهيد

هذي الخلاصه الخلود اتجسَّد ابواقع
إسمه الحُسين وأبد ما يمنعه مانع
هذا الذي بس إله جفن الزمن دامع
بس لليعرفه ويتبعه ويندِبه شافع

هذا وارث أنبياء الله وعِدِل قرآنه

هذا ثار الله وشهيده وقدرته وسلطانه

حسين أكبر مُعجزه وهذا أمر أكيد

راية الله وبيهه دم

من منحر الشهيد