الاسم الأعظم

ننتظرك يا مهدينه
كلّ العالم يسمعنه

يا ما صحنه ونادينه
ما يتغيّر واقعنه

يا ما صحنه ونادينه

غيبتك سرّ اسم الأعظم عبرت احدود المعاجز
يمته تظهر يا إمامي وتنرفع كلّ الحواجز
اُمّتك يالمهدي عكبك عايشه ابعصر الهزاهز
حكها ضايع بالمطامع هذا واقع واليدافع

بالشدد تلكاه عاجز

نتأمّل طلعة نورك
عكبك يالغايب ضعنه

نتأمّل يوم اظهورك
ما يتغيّر واقعنه

يا ما صحنه ونادينه

هذي يبن الحسن شكوه وانته تعرف محتواها
لو حجيت الناس كالوا جلمته المغرض حجاها
الوادم اتفسّر كلامي حسب قدرة مستواها
لا مواهب لا مكاسب بس متاعب والمطالب

ضاعت وضعنه وراها

وشموس الإنسانيه
واحنه بهاي اتوقعنه

عن هالعالم مخفيّه
ما يتغيّر واقعنه

يا ما صحنه ونادينه

الك يبن الحسن اكشف هالوقايع عن دلايل
لو ردت أحجي اويه غيرك أنحسب رجعي ومجادل
وانته تدري احجاية الحك صعبه وتولّد مشاكل
واليسامح حكّه رايح واليصارح حجيه جارح

ينجعل كل حجيه باطل

جلمة حك وكلناها
جلمه وتحمل هالمعنه

وين اليفهم معناها
ما يتغيّر واقعنه

يا ما صحنه ونادينه

خل نجي انراجع الدين وندرس أهدافه القويمه
ونبتدي انطبّق دروسه بالأساليب الحكيمه
وندرك الغايه ونجدد ماضي أمتنه العظيمه
وابجهدنه انخط مجدنه واحنه عدنه معتقدنه

وعدنه فكرتنه السليمه

بالآيات القدسيّه
لو ما نعرف موقعنه

والخطوات العلميّه
ما يتغيّر واقعنه

يا ما صحنه ونادينه