ندعي للحجة سويه
عبد الستار جابر الكعبي
بالذهاب والإياب ندعي للحجّة سويّه
نطلب من الله الثواب يظهر الكل البريّه
علينــه ميطول الغيــاب
هاذي اوجوه الأطايب ماتهمهم كل مصايب
كلهه للمهدي حبايب حتّه لو شافوا عجايب
ولـو صـرخ بيهـم غـــراب
سنين يالمهدي نتاني وتدري بينه اشكَد نعاني
ونعد ساعات وثواني الهدم زاد وما كو باني
وانتــه تـــدري بالاســباب
ليليش صبرك طال واحنه جم مصيبه البيهَ طحنه
محنه ترمينه إعله محنه وما طلع واحد نصحنه
وحـط ادينــه إعله الصـواب
غيابك وصبرك علينه وانته تدري الصار بينه
طوّل وطالت اسنينه وتدري كل شي مو بدينه
لـــو بطــه عنـــّه الجــواب
يا ما عانينه ونعاني وحرّفوا كل المعاني
وهمّه لعبوا بالأماني وكلشي لولا الأمل فاني
والأمـــل دونــك ســــراب
خلنه يالمهدي إعله بالك وتصبح الدنيه حلالك
والله ينقذنه بوصالك ناسهه كلهم اعيالك
مـــا تفــــرّقهم احـزاب
