اشهل عجايب وإنت غايب

اشهل عجايب

يالمهدي شفنه اغيوم

اشهل عجايب

وإنت غايب
تمطر دمع واهموم
وإنت غايب

يبن الصرعوه ابمحرابه دمه اتفايض بالمحراب
يبن الما راعوا حرمتها طيحوا محسن خلف الباب
حانت يالغايب ساعتها الأمه انگلبت عالأعقاب
يا من تزرع موت ابسيفك گوم إحصد يالمهدي ارگاب

هذا ثارك

وعين السماء اليوم

بإنتظارك
تمطر دمع واهموم

لا ماضي ايشرف لا حاضر أمة اتعيش اعله الأوهام
مرت ألف وأربعمية عام ايمر أتعس من عام
نصحه اعله الدمعه المسفوحه ونغفه اعله افراش الآلآم
لا رأفه ابعاجز ننظرها ولا رحمه اتنول الأيتام

بس نفاخر

وغيمة سمانه اتحوم

بالمظاهر
تمطر دمع واهموم

لا رحمه ولا إنسانية ما ندري اشصار ابها الناس
چن أنظر أشباح وتمشي لا تفكير ولا إحساس
لو جدك يحضر يالمهدي إتغير اعليه نفس الأجناس
چان إنعادت لوعات الطف وهم فصلوا عن جسمه الراس

هذا واضح

ودنيانه عالمظلوم

لا تسامح
تمطر دمع واهموم

يالغايب من عندك ننشد من تظهر تطلب يا ثار
تطلب ثار الدم اليجري من صابوا راس الكرار
لو تطلب كسرة ضلع أمك من عصروها ابباب الدار
لو ثار اللي وذروا جسمه ورفعوا راسه اعله الخطار

قلبي دامي

خلت سمانه الگوم

يا إمامي
تمطر دمع واهموم

ثار الماضي وثار الحاضر تتواصل نفس الأحزان
ما رحمه انوجدت بالوادم المدمع فجر بركان
گوم اللي ذبحوا عبد الله واتصوب بالطف عطشان
اتجدد ماضيهم يالمهدي وذبحوا من عدنه الرضعان

اتظل سمانه

تنزف لهيب ولوم

من دمانه
تمطر دمع واهموم

يالمهدي امصايب ما تنعد حصلت ببلاد النهرين
هاي الأرض الضمت حيدر وأرض الحضنت جسم الحسين
وسفه اتعيش ابهاي الحاله وتترقب يومك كل عين
و شعب اعراگ ايصيح ويهتف يالغايب ميعادك وين

ابلوعه صرنه

شايف بدر وإنجوم

وإنتظرنه
تمطر دمع واهموم