تحيرني و تذكرني يا جابر لا تناشدني

تحيرني وتذكرني

يا جابر لا تناشدني

يا جابر هيجت حزني يجابر گلبي ذكرته
عليمن تنشد وما ظن مثل ضيم الذي شفته
عتابك زيد آلامي يا عمي وحيلي هدمته
دفنت احسين أبويه اشلون وبديه ابگبره نزلته

وكلف وضعي

وحيد ومن يساعدني

ويهل دمعي

يا جابر لا تناشدني

يا جابر مرمي من شفته هويت اعليه أشمنه
وأبد ما تنعد اجروحه وحرت يا جرح أضمدنه
يا جابر جسمه الموذر گمت بحفوفي ألمنه
وأشوف اضلوعه مهشومه يجابر خاف ألچمنّه

انشده فكري

عليل وجرحي ضاهدني

وحرت بأمري

يا جابر لا تناشدني

شفت بعيوني يا جابر شبيه المصطفه الأكبر
ذبيح وبالدمه امخضب وأعاين جسمه لموذر
يجابر من گمت منه وحگ جدي علي حيدر
توچيت اعله وجه الگاع ردت أنهض لچن مگدر

حنه ظهري

أخويه افقدته بيدني

ونفذ صبري

يا جابر لا تناشدني

وشفت لمن وگع عمي الچفيل وگطعوا الچفين
تعنه الخيمة العباس ابظهر محني أبويه احسين
وعمدها الطيحه بيده وجذب حسره وتهل العين
وأشوفن والدي بحيره وحيد ابولية الصوبين

انقطع نحره

الخطر أصبح يهددني

انهشم صدره

يا جابر لا تناشدني

يجابر قصتي قصه تحير أهل الفكر بيها
إلك من يا كتر أبدي لون يجابر أحچيها
مسيت العاشر أذكرها ولعيال اشجره اعليها
خيم حرگوها والتهبت عليل اشلون أطفيها

وخيم شبت

وأشوف النار التدي

وحرم هجت

يا جابر لا تناشدني

تذكرني ويهل دمعي عله الوجنه شبيه السيل
ورماني چم سهم ظالم وأحسه يهدم الحيل
شفت أيتام أبويه احسين يجابر تسحگها الخيل
وشفت عيله يضربوها وإلمن تشرد ابها الليل

وشفت زينب

تنادي خويه شاهدني

غدت تنحب

يا جابر لا تناشدني